ᒉᐧᑳᔫ ᐧᐁᐦᒋ ᒌ ᐧᐄᒋᒥᐧᑳᐤ
ᓅᐦᑯᒻ ᑲᔦ ᓂᒧᔓᒻ
(Why I Lived with Grandmother)

written and read by:
Daisy Moar

sound editing by:
Marie-Odile Junker

text edited by:
Patricia Diamond and
Louise Blacksmith

ᐆ ᒉ ᑎᐹᒋᒧᐧᐃᔮᓐ, ᒉᐧᑳᓐ ᐅᐦᒋ ᐧᐁᐦᒋ ᒌ ᐧᐄᒋᒥᐧᑳᐤ ᓅᐦᑯᒻ ᑲᔦ
ᓂᒧᔓᒻ᙮ ᒥᐦᒉᐧᑖᐤ ᑳ ᒌ
ᐃᑌᔨᐦᑕᒫᓐ ᐄᔑ ᒉᐧᑳᓐ ᐧᐄᐧᐋᐤ
ᐧᐁᐦᒋ ᒌ ᐧᐄᒋᒥᐦᐧᑳᐤ, ᐁᑳ
ᓂᓃᒋᐦᐄᑯᒡ ᐅᐦᒋ ᐧᐄᒋᒥᐧᑳᐤ᙮ ᒨᔥ ᒫᒃ ᓂᒌ ᐊᔮᓐ ᐆ ᑲᐧᑫᒋᔅᒉᒧᐧᐃᓐ᙮

ᒉᒃ ᒫᒃ ᒌ ᐃᔅᐸᔫ ᐯᔭᐧᑳᐤ ᒉ ᒌ ᑲᐧᑫᒋᒥᒃ ᓅᐦᑯᒻ ᐅᔫ ᒉᐧᑳᔫ᙮
ᒉᐧᑳᓐ ᐧᐁᐦᒋ ᒌ ᐄᔑᐦᓈᑯᒡ ᐆ,
ᐁᐅᒄ ᒫᒃ ᐅᔫ ᑳ ᐃᑖᒋᒨᔥᑐᐧᐃᑦ᙮

ᓅᐦᑯᒻ ᓂᔮᓈᓀᐤ ᒌ ᐊᔮᐧᐁᐅᒡ
ᐊᐧᐋᔖᐦ᙮ ᓂᑳᐧᐄ ᐧᒫᐅᒡ ᒌ
ᒋᔐᐄᔨᔫ, ᐊᓂᔫᐦ ᒫᒃ ᓂᔥᑐ
ᒦᓐ ᑳ ᐊᑕᐦ ᐊᔮᐧᐋᐧᑖᐤ ᐊᐧᐋᔖᐦ ᓇᒧᐃ ᒋᓀᐅᔥ ᐅᐦᒋ ᒌ
ᑲᓇᐧᐁᔨᐦᑕᒣᒉᓂᒌ᙮ ᐊᓂᔫ ᒫᒃ ᒦᓐ ᑳ ᐃᔅᐸᔨᐧᑖᐤ ᒉᐧᑳᔫ ᔖᔥ ᒌ
ᐅᓈᐯᒦᐦᒉ ᐧᐄ ᓂᐧᑳᐧᐄ᙮ ᐁᑯᐦ ᒥᒄ
ᓀᐤ ᒌ ᐊᔮᐧᐁᐦᒉᓂᒌ ᐅᔫᐦ
ᐅᑕᐧᐋᔒᒧᐧᐋᐤᐦ᙮

ᐁᑯᐦ ᐅᔫᐦ ᐧᒫᐅᒡ ᑳ ᐊᐧᐋᔑᐧᐃᔨᒡ ᓃᔓ ᓈᐯᔥ ᑳ ᐊᔮᐧᐋᐧᑖᐤ
ᓵᒦᔨᓪ ᑲᔦ ᒫᒃ ᐧᑖᒥᔅ ᒌ
ᐃᓯᓂᐦᑳᓲᔫᐦ᙮ ᔖᔥ ᑮᐹ ᒌ
ᒫᒥᓯᒋᑎᔒᔫᐦ, ᐧᐃᔦᔥ ᓂᔮᓈᓀᐤ
ᒫᒃ ᓂᑯᐧᑖᔥᒡ ᒌ ᐃᑎᐦᑐᐳᓀᓰᔫᐦ᙮

ᐅᔫᐦ ᒫᒃ ᐅᑖᐧᐋᔒᒻ ᒨᔥ ᔖᔥ ᒌ ᐧᐊᐧᐄᒉᐧᐁᐦᒉ ᐊᓂᑌᐦ ᒉᐧᑳᔫ ᐁ ᐃᐦᑕᒃ᙮ ᐁ ᓂᑑ ᓂᑯᐦᑌᑦ ᑲᔦ ᐁ ᓂᑑ ᐊᑯᑖᑦ ᓂᐧᑳᓐᐦ᙮ ᐊᓂᔫ
ᒫᒃ ᐊᓂᑦ ᒨᔥ ᑳ ᒌ ᐃᐦᑖᐧᑖᐤ
ᒋᔅᒎᑳᐤ ᒌ ᐃᔑᓂᐦᑳᑌᔫ᙮ ᐁᑯᑦ ᒨᔥ ᒌ ᒦᐅᔅᑲᒥᐦᑖᐦᒉᓂᒌ ᒫᓐᐦ᙮ ᒧᔖᐧᐁᐦᔮᐅᐲᓯᒻ ᐁ ᐊᑯᒋᓂᔨᒡ ᐁᑯᐦᑦ ᒌ ᓈᑖᐦᐋᒦᒉᓂᒌᒡ
ᐧᐋᔅᑳᐦᐄᑲᓂᔫ᙮

ᐁᑯᐦ ᐊᓂᔫ ᐁᑎ ᓃᐱᓂᔨᒡ,
ᐊᓂᑦ ᐧᐋᔅᑳᐦᐄᑲᓂᐦᒡ ᒌ
ᐃᐦᑖᒉᓂᒌ᙮ ᒉᒃ ᒌ ᐋᐦᑯᓰᔨᒉᓐ
ᐊᓂᔫᐦ ᑳ ᒋᔐᐄᔨᔫᔑᔨᒡ ᓵᒦᔨᓪ ᑳ ᐃᓯᓂᐦᑳᓲᔨᒡ᙮ ᓇᓈᐦᒥᒋᒻ ᑳ
ᐊᑕᐦ ᐋᐦᑯᓯᔨᒡ, ᒉᒃ ᑖᐧᐯ ᓇᒧᐃ ᐅᐦᒋ ᐱᒫᑎᓰᔫ᙮

ᒉᒃ ᒦᓐ ᑳ ᐅᑎᒋᐸᔨᔨᒡ ᒉ
ᐴᓯᐧᑖᐤ ᐁᑎ ᑕᐦᐧᑳᒋᓃᔨᒡ, ᐊᓂᑌᐦ ᓂᑑᐧᐄ ᒉ ᐃᐦᑖᐧᑖᐤ
ᐃᔅᑲᓂᐱᐳᓐᐦ᙮ ᐊᔮᐸᒡ ᐁᑯᑌᐦ ᐊᓂᑌᐦ ᒋᔅᒎᑳᐦᒡ᙮

ᐃᔥᑯᑕᒃ ᒫᒃ ᓇᓈᐦᒉ ᐊᓂᑌᐦ ᑳ ᐃᐦᑖᐧᑖᐤ᙮ ᒉᒃ ᒉᔅᒉᔨᐦᒫᑦ ᒦᓐ
ᐊᓂᔫᐦ ᐧᒫᐅᒡ ᑳ ᐊᐧᐋᔒᐧᐃᔨᒡ
ᐧᑖᒥᔅ ᑳ ᐃᓯᓂᐦᑳᓲᐧᐃᒡ ᐁᑳ
ᒥᔪᐱᒫᑎᓰᔨᒡ᙮ ᓇᓈᐦᒥᒋᒻ ᐁ ᒌ ᐊᑕᐦ ᐋᐦᑯᓰᔨᒡ, ᒉᒃ ᑖᐧᐯ ᒦᓐ
ᓇᒧᐃ ᐅᐦᒋ ᐱᒫᑎᓰᔫᐦ᙮

ᔖᔥ ᑲᔦ ᓃᔮᓐ ᓇᒧᐃ ᓅᐦᒋ
ᐃᐦᑖᓈᓇᐦᒉ ᐅᑕᐦ ᐧᐋᔅᑳᐦᐄᑲᓂᐦᒡ᙮ ᒋᓄᔐᐤ ᓰᐲ ᐃᔑᓂᐦᑳᑌᐤ ᐅᑌᐦ
ᐧᑫᔅᑌᐦ ᐆ ᒉᐃᒥᔅ ᐯᐃ ᐁ
ᐧᐋᔑᐦᐋᑦ ᐁᑯᑌᐦ ᑳ ᐃᐦᑖᔮᐦᒡ᙮
ᓂᒌ ᓃᔓᐳᓀᓯᓐ ᓃ, ᔖᔥ ᒌ
ᐃᐦᑖᐦᒉ ᑲᔦ ᐊᓐ ᓂᔒᒻ ᑭᕐᑏ ᑳ ᐃᓯᓂᐦᑳᓲᑦ᙮

ᐃᔥᑯᑕᒃ ᒫᒃ ᑳ ᐧᐄᐦᑕᒧᐧᐋᑲᓄᐧᐃᑦ ᓂᑳᐧᐄ, ᒦᓐ ᐊᓂᔫᐦ ᑯᑕᒃ
ᐅᔒᒥᔥ ᐁᑳ ᐃᐦᑖᔨᒡ᙮ ᐁᑯᐦ ᒌ ᐯᒋ ᐴᓰᔨᐦᒉᓂᒌ ᒋᓄᔐᐤ ᓰᐲᐦᒡ
ᐅᐦᒋ ᐊᓂᑌᐦ ᐁ ᐃᔑᐦᒋᒣᐧᑖᐤ
ᒋᔅᒎᑳᐦᒡ᙮

ᐁᑯᑦ ᐧᐁᔨᐸᔥᒌᔥ ᒌ ᐃᐦᑖᒉᓂᒌ ᓂᑳᐧᐄ᙮ ᐁᔥᒄ ᑮᐹ ᓇᒧᐃ ᐅᐦᒋ ᑕᐦᑳᔮᔫ᙮ ᒉᒃ ᒫᒃ ᑳ ᐅᑎᐦᒋᐸᔨᔨᒡ ᒉ ᒌᐧᐁᐦᐆᐧᑖᐤ᙮ ᐁᑯᐦ ᓅᐦᑯᒻ
ᑳᓂᑐᐧᐁᔨᐦᒥᑦ ᒉ ᐧᐄᒋᒥᐦᐧᑳᐤ᙮
ᓇᒧᐃ ᓅᐦᒋ ᓂᑐᐧᐁᔨᐦᒪᒄ ᒦᓐ ᒉ ᐴᓯᐦᐄᑯᔮᓐ᙮ ᑳ ᓂᐦᐁᔨᐦᑖᐧᑳᐤ ᑮᐹ ᓅᐦᑖᐧᐄ ᑲᔦ ᓂᑳᐧᐄ᙮

ᓂᒌ ᐃᑎᒄ ᓅᐦᑯᒻ, ᐃᔥᑯᑕᒃ ᒫᒃ ᒉ ᐴᓯᐧᑖᐤ ᐊᓂᔮ ᑰᐦᑖᐧᐄ, ᐲᔦᒋ ᑯᔅᐸᐦᐧᑖᐤ, ᒫᐦᒋᒡ ᐁ ᐯᒋ
ᐧᐋᒋᔦᒥᑯᔮᐦᒡ᙮ ᐁᑯᐦ ᐊᓂᑌᐦ ᐁ ᐊᐱᔒᔨᓐ ᐲᔦᒋ ᓂᑑᐧᐋᐸᒥᔅᒃ᙮ ᐁ ᐅᒉᒥᔅᒃ ᐱᔑᔑᒃ ᒫᒃ ᐁ
ᒫᑑᑦ ᐊᓂᔫ ᐁ ᐃᐦᑑᑕᔅᒃ᙮ ᓈᔥᒡ ᒫᒃ ᐁ ᒋᔅᑎᒫᒉᔨᐦᒪᒃ ᐁ ᐧᐋᐸᒪᒃ ᐊᓂᔫ ᐁ ᐃᐦᑕᒃ᙮

ᐁᑯᐦ ᐁ ᐃᐦᑖᒃ ᒋᑑᔅ ᐄᓈᐦ
ᐁᑯᔥ ᒫᐦ ᐱᒋᔅᑎᓈᑖᐤ ᐧᐁᓵ
ᒋᒋᔅᑎᒥᐦᐋᓄᐧᐃᒡ ᐁᔥᒄ ᐁ
ᐱᒫᑎᓰᔨᒡ ᓈᔥᒡ ᐁ
ᒥᐦᒉᔨᐦᑕᒥᐦᐄᐧᑳᐤ᙮ ᐁᑯᐦ ᓇᒧᐃ
ᐅᐦᒋ ᓂᐦᐁᔨᐦᑕᒧᐧᐋᑯᐸᓀᓂᒡ ᓂᑑᔅ ᐄᓈᐦ ᑲᔦ ᓅᐦᑯᒥᔅ ᐧᐋᓪᑎᕐ ᒉ
ᒌᐧᐁᐅᐦᐄᑯᔮᓐ᙮

ᐁᑯᐦ ᒌ ᐊᑎ ᐴᓰᒉᓂᒌ ᓂᑳᐧᐄ ᑲᔦ ᓅᐦᑖᐧᐄ, ᓂᔒᒥᔥ ᒫᒃ ᑭᕐᑏ᙮ ᑳ ᓂᑲᑕᐦᐆᑯᐧᐃᔮᓐ ᓃ᙮ ᐁᐅᒄ ᒫᒃ ᐧᐁᐦᒋ ᒌ ᐧᐄᒋᒥᐦᐧᑳᐤ ᓅᐦᑯᒻ ᑲᔦ ᓂᒧᔓᒻ ᑳ ᓃᔓᐳᓀᓰᔮᓐ᙮

ᑖᐧᐯ ᒌ ᐋᔨᒥᓂᔫ ᓅᐦᑯᒻ ᑲᔦ
ᓂᒧᔓᒻ ᐅᔫ ᒉᐧᑳᔫ ᑳ
ᐃᔅᐸᔨᔨᐦᐧᑖᐤ᙮ ᒌ ᐃᑌᐤ ᓄᐧᐃᒡ
ᐋᔨᒥᓂᔫ ᐊᐧᐁᓐ ᐁ ᐧᐊᓂᐦᐋᑦ
ᐅᑖᐧᐋᔒᒻᐦ ᔖᔥ ᐁ ᒌ
ᐊᔨᒥᐦᐄᑯᑦ ᑲᔦ ᐁ ᒌ ᐧᐄᒉᐧᐋᑦ ᐊᓂᑌᐦ ᒉᐧᑳᔫ ᐁ ᐃᐦᑖᒃ᙮ ᒥᒎᓐ ᐯᔭᒄ ᐱᐳᓐᐦ ᓇᒧᐃ ᓅᐦᒋ ᒌ
ᐃᐦᑑᑌᓐ ᐅᔫᐦ ᒉᐧᑳᔫᐦ ᑳ ᒌ
ᐃᐦᑎᔮᓐ ᒫᓐᐦ᙮

ᓂᒥᔦᔨᐦᑌᓐ ᐁ ᒌ ᐧᐄᒋᒪᒃ ᓅᐦᑯᒻ ᑲᔦ ᓂᒧᔓᒻ, ᒥᔥᑕᐦᐄ ᒉᐧᑳᔫ ᓂᒌ ᒋᔅᑯᑕᒫᒄ ᓅᐦᑯᒻ᙮ ᐁᔥᒄ ᐊᓄᐦᒌᔥ ᓂᒋᔅᒋᓲᐧᐋᓐ ᐊᓂᔫᐦ ᒉᐧᑳᔫᐦ ᑳ ᒌ ᐄᔑᑦ ᒣᐧᑳᒡ ᑳ ᐯᒋ
ᐆᐦᐱᓂᑖᐅᒋᓂᑦ᙮